Alavabusek gaueko zerbitzuak eskainiko ditu larunbatetan zenbait lineatan datorren asteburutik, arabarrek errazago goza dezaten aisialdiaz eta garraio publikoan itzul daitezen bizilekura. Zerbitzu horiek Langraiz Oka, Santikurutze Kanpezu, Maeztu, Alegria-Dulantzi, Agurain eta Araia Gasteizekin lotuko dituzte, eta Oion eta Guardia Logroñorekin. Gaueko bidaiek, lehen fasean, 23:00etatik 01:30era bitarteko ordutegiak izango dituzte, linea eta ibilbidee arabera.
Jon Nogales Mugikortasun Jasangarriaren eta Bide Azpiegituren Saileko foru diputatuak eta Patricia Perez Mugikortasun eta Garraio zuzendariak zerbitzu berrien ezaugarriak aurkeztu dituzte astelehen honetan, eta beste hobekuntza batzuk iragarri dituzte, hala nola asteburuetan arratsaldeko maiztasunak indartuko direla eta Armiñon eta Gasteiz arteko zuzeneko lotura abiaraziko dela Gasteiz/Haro 12 linearen bidez.
Nogalesek azaldu du gaueko bidaia berriak Arabako Mugikortasun Jasangarriaren II. Planaren hedapenean eta Elkarrekin Araba alderdiarekin sinatutako aurrekontu akordioan kokatzen direla. Iragarri du lehenengo fasean larunbatetan hasiko direla lanean, Gasteiz eta Logroño inguruko Arabako udalerri populatuenei zerbitzua ematen dieten lineetan, eskaintza arruntari jarraipena ematen dioten ordutegiekin.
"Gaueko bidaiak eskaintzen hasiko gara eskaera gehien duten Alavabusen lineetan, zeinen ibilbideek udalerririk garrantzitsuenak zeharkatzen baitituzte, eta, emaitzen arabera, zerbitzu hori pixkanaka zabalduko dugu lurraldeko beste linea eta udalerri batzuetara, eta ostiraletara eta jai bezperetara ere zabalduko ditugu", gaineratu du.
Gaueko zerbitzuen plangintzaren helburua da, ahal den neurrian, irteera ordu biribilak eskaintzea -ahal dela puntuan edo erdietan-, buruz ikasteko errazak, eta koherentzia izatea Tuvisak ematen duen Gautxori zerbitzuarekin.
Bada, 5 linean (Gasteiz/Alegria-Dulantzi/Agurain/Araia), 6 linean (Gasteiz/Santikurutze Kanpezu/Lizarra), 13 linean (Gasteiz/Langraiz/Boveda), 8 linean (Logroño/Oion/Guardia) eta 10 linean (Logroño-Haro) eskainiko dira gaueko zerbitzuak.
Aldi berean, Arabako Aldundiak bidaia gehiago sartuko ditu AR01 Araba Erdialdea eta AR03 Arabako Errioxa emakiden Alavabusen linea horietan eta beste batzuetan, asteburuetako arratsaldeetan eskaintza indartzeko, eta, kasuren batean, baita astelehenetik ostiralera ere. "Herritarrei zerbitzu jarraituagoa eta homogeneoagoa eskaini nahi diegu egun osoan", adierazi du foru diputatuak.