Afrikaldia Afrikar Zinemen Euskal Jaialdiaren seigarren edizioa egingo da Gasteizen azaroaren 3tik 10era, eta aurten hamar film izango ditu sail ofizialean. 'Identitatea eta kidetza aldatzen ari den mundu batean' lelopean, "eraldatzen ari den mundu bateko identitateei eta kide izatearen sentimenduari buruz hausnartzera gonbidatuko du egitasmoak", aurkezpenean azaldu dutenez.
Fikziozko sei film luzeren eta lau dokumentalen bidez, jaialdiak Afrikako zinemen aniztasuna erakusten duten istorioak eta esperientziak hurbilduko dizkie ikusleei, eta gero eta kulturaniztunagoa den munduko gizarte eta kultur aldaketak esploratzeko aukera emango dute.
Sail ofizialaren programazioak askotariko proposamenak eskainiko ditu, hala nola familia barruko dramak ('My Father's Shadow'), thriller sozialak ('Diya') eta komedia dramatikoak ('One Woman One Bra'). Nobedadeen artean, Damien Hauserren 'Memory of Princess Mumbi' nabarmentzen da, adimen artifizialak sorkuntza zinematografikoan dituen aukerak aztertzen dituen eta zinema garaikidearen narrazio eta ikusmen prozesuei buruzko ikuspegi berriak irekitzen dituen filma.
ESPAZIO BERRIAK
Afrikaldiak hirian duen presentzia ere handitu du, aurtengo programazioan txertatutako espazio eta jarduera berriekin. Arkabia eta Izaskun Arrue Kulturguneaz gain, Jai Alai apartamentuak izango dira Industria Sailaren jardueren egoitza.
Izaskun Arrue Kulturgunean euskarazko azpitituluak dituzten filmen saioak mantenduko dira, eta Arkabian atal ofizialeko proiekzioak eskainiko dira lehen aldiz. Era berean, Olagibel kaleko FOT & CO denda izango da jaialdiaren egoitza ofiziala eta informazio gunea.
Jaialdiak hiru sari emango ditu: epaimahaiak erabakitako film onenarena eta jatorrizko soinu banda onenarena, eta publikoaren saria film onenari. Epaimahaia Jusciele Oliveira, Lamine Thior eta Carmen San Estebanek osatuko dute.
Aurtengo edizioaren berrikuntza gisa, EITB-Afrikaldia saria emango da azaroaren 3an 19:00etan Arkabiako egoitzan egingo den irekiera ekitaldia, ikus-entzunezko industrian aniztasuna sustatzen duten pertsonei balioa ematea helburu duen aitortza berria. Inaugurazio ekitaldirako sarrerak doakoak dira eta Arkabiako webgunearen bitartez eskuratu ahal izango dira.