Lehengo aldiz jarriko da abian partekatutako taxiaren zerbitzua Eskoriatzan. Urteak egon dira ikertzen herrian topatzen diren mugikortasun arazoak konpontzeko erantzun bat eta aurkitu egin dute.

Gipuzkoako Kale Nagusian Joserra Zubizarretarekin, Eskoriatzako alkatearekin, hitz egin dugu proiektu honen inguruan aurkezpena baino lehen eta konfiantza handia duela adierazi du: "Herritarrekin batera garatutako proiektu bat da, herritarren beharrei egokitutakoa".

Alde batetik, Zubizarretak, azpimarratu nahi izan du mugikortasun iraunkorrago bat lortuko dela, errepide batzuetan auto-pilaketak sortzen baitziren eta bertan emisio-isurketak egoteaz gain, istripuak ere gertatu ohi ziren. 

Bestetik, zerbitzu hau baserrietan eta urrun bizi diren heldu, haur eta adinduei, bereziki, erosketak egiteko eta eskolara joateko ibilbidea erraztuko die.

Zerbitzua, esan bezala, irailaren 27an hasiko da, taxietan oinarrituko da eta prezioa bi eurokoa izango da, batez beste.