Prezioak %0,3 jaitsi dira irailean EAEn eta urte arteko tasa %3,3 da

Kontsumo Prezioen Indizeak (KPI) %0,3ko jaitsiera izan du irailean Euskal Autonomia Erkidegoan (EAE), aurreko hilarekin alderatuta, eta horrela, urte arteko tasa %3,3 da. Era berean, prezioak %1,8 igo dira urteko lehen bederatzi hilabeteetan, INE estatistika erakundearen datuen arabera.

Sektore bakoitzaren bilakaerari dagokionez, aurreko hilaren aldean, prezioek behera egin dute irailean etxebizitza, ur, elektrizitate, gas eta beste erregai batzuetan (-%0,1), garraioan (-%0,2), komunikazioetan (-%0,1), aisia eta kulturan (-4,8) eta jantoki eta hoteletan (-%0,3).

Prezioak ez dira aldatu hil artean altzari eta etxeko artikuluetan eta beste ondare eta zerbitzuetan (%0,0na), eta igo egin dira elikagai eta alkoholik gabeko edarietan (%0,2), alkoholdun edari eta tabakoan (%0,5), jantzi eta oinetakoetan (%4,4), osasunean (%0,2) eta hezkuntzan (%0,9).

ZENBAKIETAN

Urte arteko aldiari dagokionez, prezioak talde guztietan gehitu dira irailean: %3,4 elikagai eta alkoholik gabeko edarietan, %4,0 alkoholdun edari eta tabakoan, %1,3 jantzi eta oinetakoetan, %7,0 etxebizitza, ur, elektrizitate, gas eta beste erregai batzuetan, %1,5 altzari eta etxeko artikuluetan, %2,3 osasunean, %2,5 garraioan, %0,9 komunikazioetan, %0,3 aisia eta kulturan, %2,5 hezkuntzan, %4,4 jantoki eta hoteletan eta %3,4 beste ondasun eta zerbitzuetan.

Azkenik, 2025eko lehen bederatzi hilabeteetako bilakaeran, prezioak jantzi eta oinetakoetan (-%9,9) eta aisia eta kulturan (-%2,2) jaitsi dira, eta gainerakoetan igo: %1,6 elikagai eta alkoholik gabeko edarietan, %3,4 alkoholdun edari eta tabakoan, %3,8 etxebizitza, ur, elektrizitate, gas eta beste erregai batzuetan, %0,7 altzari eta etxeko artikuluetan, %2,1 osasunean, %1,4 garraioan, %1,9 komunikazioetan, %1,1 hezkuntzan, %5,9 jantoki eta hoteletan eta %2,8 beste ondasun eta zerbitzuetan.