Maitatzea, edozein baldintzetan

"Euskadin, GIBa duten pertsonak enplegu deialdi publikoetan baztertuak izaten dira oraindik, inolako funts zientifikorik gabe", azaldu zuten atzo Gehitu elkartetik Zero Diskriminazioaren Nazioarteko egunean.

XXI. mendean aurrerapauso asko egin dira, baina badirudi funtsezko alderdi batzuk oraindik atzerago daudela. Edozein motatako pertsonen arteko berdintasuna lortzeko, –emakumeena, gizonena, lesbiana, gay, transexual, bixesual edo intersexualena– borroka gogorra dago oraindik. Gasteizek atzo ospatu zuen Zero Diskriminazioaren Nazioarteko Eguna, eta Gehitu elkartetik, Gais, Lesbiana, Trans, Bisexual eta Intersexualen elkartetik ziurtatu zuten oraindik badagoela asko egiteko oraindik, azaldu zutenez.

"Euskadin, GIBa duten pertsonak enplegu deialdi publikoetan baztertuak izaten dira oraindik, inolako funts zientifikorik gabe". Hitz horiekin, elkarteak argi utzi zuen oraindik pairatzen den desberdintasuna eta gizarteak pertsona eta gaixotasun horien aurrean sentitzen duen gaitzespena. Hala, atzoko eguna aprobetxatuz, bertatik gizarteko pertsona eta kolektibo guztien berdintasunerako eskubidea aldarrikatu nahi izan zuten eta horregatik diskriminaziorik ez jasateko eskubidea defendatu zuten. Izan ere, 2013az geroztik, martxoaren 1ean Zero Diskriminazioaren Nazioarteko eguna ospatzen da Nazio Batuen Batzar Nagusiaren erabakiaren ondorioz. Aurten Deusezta ditzagun kaltetzen gaituzten legeak, sor ditzagun ahalduntzen gaituzten legeak da egun honen goiburua, eta horrekin "azpimarratu nahi da lege baztertzaileen aurkako neurriak hartzeko premia".

Ildo horretatik, azaldu zutenez, herrialde askotan, lege horiek ondorio "larriak dituzte": "pertsonak desberdin tratatuak izaten dira, oinarrizko zerbitzuetan bazterkeriak gertatzen dira, edota beren bizitzaren jardueran bidegabeko mugak izaten dituzte, eta horren guztiaren arrazoi bakarra desberdinak izatea da, desberdin jokatzea edo desberdin maitatzea. Lege baztertzaile horiek giza eskubideak eta funtsezko askatasunak urratzen dituzte", salatu zuten.

Ildo horretatik jarraituz, azpimarratu zutenez, botere publikoek betebehar "moral" eta "legezkoa" dute, nazioarteko hitzarmenen eta ordenamendu konstituzionalen arabera, lege baztertzaileak ezabatzeko, bai eta bazterkeriaren aurrean pertsona guztiak babestuko dituzten lege berriak onartzeko ere. "Guztion erantzukizuna da Estatuei eta botere publiko eskudunei exijitzea beren betebeharra bete dezatela eta, halaber, aldaketaren alde eta lege baztertzaileak ezabatzearen alde jardun dezatela eskatzea", adierazi zuten. Hala, martxoaren 1ean, Zero Diskriminazioaren nazioarteko eguna dela-eta, "pertsona orok bere bizitza osotasunez, duintasunez eta bazterkeriarik gabe bizitzeko duen eskubidea ospatzen eta aldarrikatzen dugu", aldarrikatu zuten. "Euskadin, GIBa duten pertsonak enplegu deialdi publikoetan baztetuak izaten dira oraindik, inolako funts zentifikorik gabe. Ondorioz, Gehituk dei egiten die euskal administrazio publikoei bazterkeria larri hori ezabatua izan dadin", ondorioztatu zuten.

Elkartea Hiesa edo GIBa izateak oraindik ere gaitzespena eragiten duela esan du Gehituk adierazpen horiekin. Eta esperientziarekin dakite zertaz hitz egiten duten. Nortzuk osatzen dute elkarteak? Euskal Herriko Lesbiana, Gay, Transexual, Bisexualen eta Intersexualen Elkartea ehunka gizon-emakumez osaturik dago. Kide "gehienak" orientazio homosexuala daukate eta "helburu bakarrak elkartzen gaitu: gay, lesbiana, bisexual eta transexualek dituzten eskubideak oso-osorik ontzat hartuak izatea, gure sexuafektibitatea garatu ahal izateko beharrezkoa baitzaigu merezi ditugun duintasunaz eta berdintasunaz gozatzea, hala nola orientazio sexualean edota nortasun transexualean oinarrituriko gizarte- eta lege-bazterketa orori amaiera ematea", adierazten dute. Irabazi-asmorik gabeko elkartea da, burujabea, anitza eta demokratikoa. Legez erregistraturik dago eta bai erakunde publikoekin bat beste GKE batzuekin elkarlanean ari da, goian aipaturiko helburuak lortzea xede duten programak eta jarduerak bultzatzeko. Elkarteak bi finantziazio-iturri ditu: bazkideen kuotak eta dirulaguntza publikoak.

Gehitu-k bestelako ekitaldiak ere antolatzen ditu aldian behin: ibilaldiak eta kirol ekitaldiak oro har, txangoak, asteburuko irteerak eta besteak beste. "Gehitu-k, urtean zehar, orijinaltasuna eta dibertsitatea ezaugarri dituzten festak antolatzen ditu. Horrez gain, bestelako jarduerak ere antolatzen ditu, esaterako: hitzaldiak, ekainaren 28ko gay pride egunari lotutako ekitaldiak, jardunaldi monografikoak, Nazioarteko Zinemaldian Sebastiane sariak ematen ditu", azaldu eta erantsi dute: "Gure eskubideak defendatzeko garrantzi handikoak diren esparruetan hainbat jarduera eta ekimen bultzatzen ditu Gehitu-k. Bazterketaren aurka ere lan egiten du, batez ere komunikabideetan, erakunde publikoen aurrean eta hezkuntza-arloan".

"Eusko Jaurlaritzak Gehitu onura publikoko elkartea dela deklaratu zuen 2006an (Maiatzaren 2ko 88/2006ko Dekretua), Donostiako Udalak Hiritar Merituaren Domina eman zion 2004an eta Gipuzkoako Foru Aldundiak Giza Eskubideen saria eman zion 2009an. Arlo kulturalean, LesGaiCineMad, Madrileko LGBT Zine Jaialdiak 2017ko edizioan Ohorezko Saria eman die Gehituko ematen dituen Sebastiane Sariei", ondorioztatzen dute. Gainera, elkarte horrek hainbat kanpaina egiten ditu urtero. Beren lan soziala dela eta, beren ibilbidean sari bat jaso dute: Zilarrezko Gehitu Saria. Ildo horretan, hauxe azaldu zuten: "LGTBI kolektiboko herritarren oinarrizko eskubideen aldeko borrokan nabarmendu den pertsonari edo erakundeari eskaintzen zaio. Saria LGTBI Harrotasunaren nazioarteko eguna den E28ko astean zehar ematen da".

Atzo berriro ere beren lana aldarrikatu zuten. Ez hainbeste Gehituren lanagatik, bultzatzen dituen helburuengatik baizik. Homosexual guztientzat diskriminazio zero eta berdintasun nabaria lortzea, edonon daudela ere.

Elkartea. Euskal Herriko Lesbiana, Gay, Transexual, Bisexualen eta Intersexualen Elkartea ehunka gizon-emakumez osaturik dago. "Helburu bakarrak elkartzen gaitu: gay, lesbiana, bisexual eta transexualek dituzten eskubideak oso-osorik ontzat hartuak izatea, gure sexuafektibitatea garatu ahal izateko beharrezkoa baitzaigu merezi ditugun duintasunaz eta berdintasunaz gozatzea, hala nola orientazio sexualean edota nortasun transexualean oinarrituriko gizarte- eta lege-bazterketa orori amaiera ematea".