Lanbidek 8,5 milioi banatuko ditu inklusio eta gizarte eta lan berrikuntzako proiektu bereziak garatzeko laguntzetan

Lanbide Euskal Enplegu Zerbitzuak 8,5 milioi euro banatuko ditu gizarteratzeko eta berrikuntza soziolaboraleko proiektu bereziak garatzeko diru laguntzetan, Eusko Jaurlaritzak jakinarazi duenez.

Deialdiaren aurreko edizioetan bezala, helburua da lanean edo langabezian dauden baina enplegua lortzeko edo mantentzeko zailtasunak dituzten langileen enplegagarritasuna eta gaitasun pertsonalak eta profesionalak bultzatzea eta indartzea.

Proiektu bereziak erakunde publiko edo pribatu batek edo batzuek bultzatzen dituztenak dira, eta prestakuntza, orientazio, enplegu edo bestelako jarduketetako esku hartze mota desberdinak koordinatzen dituzte.

Deialdiaren zuzkidura osotik 5,95 milioi euro kolektibo zaurgarrientzako proiektu berezietarako erabiliko dira, eta beste 2,55 milioi euro berrikuntza eta esperimentazio proiektuetarako.

Foru aldundiak, udalak, toki edo eskualdeko garapen agentziak eta administrazio horien mendeko erakunde publikoak izan daitezke onuradunak, baita irabazi asmorik gabeko prestakuntza erakunde pribatuak edo Hezkuntza eta Elikadura, Landa Garapen, Nekazaritza eta Arrantza sailen mendekoak ere.

Eskabideak Lanbideren Lan-F prestakuntza aplikazio informatikoaren bidez aurkeztu beharko dira, eta erakundearen legezko ordezkariak elektronikoki sinatu beharko ditu.

Eskabideak aurkezteko epea hilabetekoa izango da, deialdia Euskal Herriko Agintaritzaren Aldizkarian (EHAA) argitaratu eta hurrengo egunetik aurrera; aurkezpen ordenaren arabera aztertuko dira, eta hurrenkera horretan onartuko dira funtsak agortu arte.