Eusko Jaurlaritzako Ekonomia, Lan eta Enplegu Sailak Euskal Autonomia Erkidegoan (EAE) gizarte ekonomiaren ekosistema bultzatzeko diru laguntzen bi deialdi onartu ditu, eta guztira 4,46 milioi euro banatuko dira 2026ko ekitaldian. Laguntzak kooperatiba eta lan sozietate berrien sorrera sustatzera eta lehendik daudenen lehiakortasuna eta kudeaketa indartzera zuzenduko dira, laguntza tekniko espezializatuko jardueren bidez.
Horrela, Jaurlaritzaren arabera, deialdi nagusiak 4.025.000 euroko zuzkidura du, eta ekintzailetza kolektiboa sustatzea, gizarte ekonomiako enpresa berriak eratzea eta bazkide langileak sartzea du helburu. Laguntzak hiru eremu handitan egituratu dira: ideia lehiaketen, preskriptore sareen eta lurralde sustapenerako planen bidez enpresak sortzearen aldeko ekosistema mantentzea; kooperatibak eta lan sozietateak eratzea eta sustatzea; bazkide mugagabeak sartzen laguntzea.
Deialdiaren barruan, gizarte ekonomiako enpresa berrien sorrera, erakunde sustatzaileen jarduerak eta bideragarritasun azterlanak babestuko ditu Ekonomia, Lan eta Enplegu Sailak, belaunaldien arteko errelebo prozesuak errazteko edo zailtasunak dituzten enpresak eraldatzeko. Halaber, langabeak, bazkide ez diren langileak, desgaitasuna duten pertsonak eta nekazaritzako elikagaien kooperatibetan sartzen diren ustiategien titularrak bazkide gisa sar daitezen lagunduko du.
Bestalde, 440.000 euro erabiliko ditu gizarte ekonomiako enpresetan laguntza teknikoa emateko deialdian, euskal kooperatiba eta lan sozietateen kudeaketa eta lehiarako gaitasuna hobetzeko. Diru laguntzari esker, kudeaketa plan eta aginte taula integralen prestaketa, merkataritza kudeaketako aholkularitza, gerentziaren profesionalizazioa, enpresak suspertzeko planak eta pertsonengan oinarritutako antolaketa eredu berrien ezarpena finantzatuko dira.
Era berean, deialdiak eraldaketa digitalarekin eta zibersegurtasunarekin lotutako jarduerak barne hartzen ditu, baita enpresa jardueraren inpaktua murriztera bideratutako ingurumen hobekuntzako proiektuak ere. Gainera, enpresa ekimen berriak errazteko eta gizarte ekonomiari laguntzeko egiturak indartzeko azterlan ekonomiko eta juridikoak jasotzen ditu.
Ekonomia, Lan eta Enplegu Sailak enpresa sare sendoagoa, lehiakorragoa eta lurraldeari errotuagoa bultzatzeko duen estrategiari erantzuten diote bi deialdiek. Eskabideak aurkezteko epea hilabetekoa izango da, aginduak Euskal Herriko Agintaritzaren Aldizkarian argitaratu eta hurrengo egunetik aurrera, eta Euskadiko administrazio publikoaren egoitza elektronikoaren bidez izapidetu beharko dira.