Euskal Autonomia Erkidegoko (EAE) industria prezioek % 0,1 egin dute behera maiatzean aurreko hilaren aldean, eta horrela, urte arteko tasa %5,1 igo da, Eustat euskal estatistika erakundeak bildutako datuen arabera.
Azterketa zehatzagoa eginda, produktu informatiko, elektroniko eta optikoen fabrikazioa (%3,3) eta erauzketa industria (%3,0) sektoreek izan dituzte igoerarik handienak prezioetan maiatzean aurreko hilaren aldean. Aitzitik, hil arteko prezioetan jaitsierarik handienak energia elektrikoa, gasa eta lurruna (-%5,4) eta koke lantegiak eta petrolio fintzea (-%3,3) sektoreetan izan dira.
Helburu ekonomikoaren araberako ondasunen sailkapenari jarraituz, apirilaren aldean jaitsiera bakarra energiaren arloan gertatu da, prezioak %3,7 jaitsi ondoren. Ekipamenduko ondasunen prezioak %0,7 igo dira hil batetik bestera, eta bitarteko ondasunenak eta kontsumo ondasunenak %0,8na.
Bestalde, urte batetik bestera, maiatzeko prezioen igoerarik handienak honako adar hauetan izan dira: koke lantegiak eta petrolio fintzea (%42,0) eta industria kimikoa (%14,2). Aitzitik, zuraren, paperaren eta arte grafikoen industria adarreko prezioek %5,9ko jaitsiera izan dute, eta produktu informatiko, elektroniko eta optikoen fabrikazioa adarrekoek %5,7koa.
Helburu ekonomikoaren araberako ondasun talde handien prezioen urte arteko aldakuntza positiboa izan da energian (%31,0), ekipamenduko ondasunetan (%2,0) eta bitarteko ondasunetan (%0,2), eta negatiboa kontsumo ondasunetan (-%2,4), ondorioztatu dute.