Indesak egingo ditu berriro Gasteizko 14 udal instalaziotako garbiketa lanak

Actualizado hace 8 minutos

Gasteizko Udaleko gobernu batzordeak Indesa 2010 S.L. enpresari esleitu dio berriro 2026an 14 udal instalazio mantentzeko eta kontserbatzeko garbiketa integrala egiteko enkargua.

Hain zuzen, Olarizuko Santa Maria, tutoretzapeko apartamentuak, Santa Isabel eta El Salvador hilerriak, Aldabe, Ariznabarra, Hegoalde, Iparralde, Judimendi, Lakua, Salburua eta Zabalgana, Europa Jauregia, San Andres kiroldegia eta San Prudentzioko ALZIko garbiketa tunela hartuiko ditu bere gain enpresak.

Gasteizko Udalaren arabera, ingurumena errespetatuz eta erabiltzaileen eta langileen osasuna eta segurtasuna bermatuz egin behar da lan hori, bai eta eraikinen estetika eta higienea zainduz ere. Konpromisoaren iraupena urtebetekoa da, 2026ko urtarrilaren 1etik abenduaren 31ra arte, eta 3.526.628 euroko kontraprestazioa du (BEZik gabe).

"Beste urte batez, Indesarengan jarri dugu konfiantza enkargu honetarako. Dagoeneko 11 urte igaro dira 2015ean elkarlanean hasi ginenetik eta emaitza ezin positiboagoa da. Mantentze Lanen Zerbitzuak garrantzi handia ematen dio udal instalazioen garbiketari, eta tandem hori behar bezala koipeztatuta dago eta ezin hobeto funtzionatzen du", esan du Izaskun Reyes Mantentze Lanetako zinegotziak.

Indesa 2010 S.L. Arabako Foru Aldundiaren eta bertan partaide gisa integratutako udalen mendeko sozietate publikoa da, eta desgaitasunen bat duten Arabako pertsonentzako kalitatezko enplegu aukerak eta gizarte, ekonomia eta ingurumen arloko enplegu-aukera iraunkorrak sortzea du helburu.

Gasteizko Udala ere Indesako partaidea da, 2014ko abenduaren 5ean eta 2018ko azaroaren 23an udal gobernu batzordean partaidetza sozialak eskuratzeko hartutako erabakien ondorioz.

Azkenik, Gasteizko Udaleko gobernu bilerak onetsi du Arriaga gizarte etxearen eta Adurtza gizarte zentroaren garbiketa integraleko kontratua RAEP S.L. enpresari esleitzea, 544.137 euroko aurrekontuarekin eta hiru urteko gauzatze epearekin.