ELA, LAB, Steilas, Etxalde eta Hiru sindikatuek osatzen duten gehiengo sindikalak lanbide arteko gutxieneko soldata propioaren aldeko martxoaren 17ko greba orokorra erregistratuko dute datorren astelehenean, urtarrilaren 19an.
Deialdiaren erregistroa asteleheneko 11:00etan egingo dute, Eusko Jaurlaritzaren Bilboko egoitzan, eta, besteak beste, ELAko Ana Zelaiak eta LABeko Ainhize Muniozgurenk deialdiaren xehetasunak emango dituzte.
Lanuztea martxoaren 17an izango da, Hego Euskal Herrian, 'Gutxieneko soldata hemen erabaki. SMI 1.500 euro. Soldatak hobetu aberastasuna banatzeko' lelopean, eta aldarrikapen nagusia da EAEko eta Nafarroako parlamentuek zehaztuko luketen lanbide arteko gutxieneko soldata propioa ezartzea.
Deialdiaren sustatzaileek zehaztu dute lanbide arteko gutxieneko soldata hori 1.500 eurokoa izango litzatekeela, eta horrek lagunduko lukeela 165.000 pertsona txirotasunetik ateratzen.
BESTE GAI BATZUK
Beste gai batzuekin jarraituz, Deustuko Unibertsitateak eta Donostiako Tabakalera Kultura Garaikidearen Nazioarteko Zentroak lankidetza hitzarmen marko bat sinatu dute, ikus-entzunezko sorkuntzaren eta zabalkundearen eremuan indarrak batzeko.
Edurne Ormazabal Tabakalerako zuzendari nagusiak eta Juan Jose Etxeberria Deustuko Unibertsitateko errektoreak izenpetu dute aste honetan bi erakundeen arteko elkarlan akordio berria, erakundeotako iturriek jakinarazi dutenez.
Hitzarmenaren helburu nagusia ikerketa, sorkuntza eta hedapen proiektuetan laguntzeko esparru bat definitzea da, eta lankidetzaren ardatz nagusia Deustuko Unibertsitateak abiatuko duen Komunikazioko graduari lotutako 'Ikus-entzunezko sorkuntza' berezko titulua izango da. Espazio horretan, formakuntza, difusio eta programazio ekintzak elkarrekin diseinatu eta burutuko dituzte bi erakundeek.
Era berean, akordioari esker, Deustuko Unibertsitateko ikasleek, eta bereziki aipatutako titulu berrikoek, ikus-entzunezko sorkuntzarekin lotutako Tabakalerako erabilera espazioak eta laborategiak erabili ahal izango dituzte beren ikasketa planeko jarduerak aurrera eramateko.