Europa Jauregiko azalera handiko areto berria egokitzeko eta bertan antolatzen diren biltzar eta ekitaldietarako edukiera eta zerbitzuak handitzeko lanak esleitu ditu ostiral honetan Gasteizko Udaleko gobernu batzordeak. Esku hartzean 559.631,80 euroko inbertsioa egingo da (BEZ barne), eta sei hilabeteko epea ezarri da. Lanak Zamakoa S.A. enpresak egingo ditu.
"Areto berria eraikinaren hirugarren solairuan egokituko da. 300 metro koadro inguruko azalera izango du, eta instalazioko gainerako tokien energia ziurtagiriaren irizpideak beteko ditu", azaldu du Borja Rodriguez Hiri Ereduaren eta Hirigintzaren zinegotziak.
Horrela, lanek aukera emango dute "espazio zabal, moldakor eta erabat hornitua sortzeko, kongresu jarduerak, hitzaldiak eta erakusketa ekitaldiak hartu ahal izateko". Jendearentzako kokapen desberdinak izango ditu, eta kabina teknikoa eta biltegia ere izango ditu.
Gainera, Europa Jauregiko gainerako espazioekiko modu autonomoan funtzionatzeko aukera izango du, eraikinaren barrutik zein kanpotik sarbidea izango duelako, fatxada nagusiaren parean dagoen eskaileraren eta igogailuaren bidez.
"Abian jartzeak bultzada handia emango dio Europa Jauregiaren edukierari", eta horrek erreferentziazko beste kongresu-esparru batzuekin lehiatzen lagunduko digu", gaineratu du Rodriguezek.
Areto berria amaitutakoan, Europa Jauregiak edukiera handiagoa izango du bilkurak eta ekitaldiak egiteko eta azken bi urteetako kopuruak hobetzeko. Gasteiz hiribideko esparruak 2024ko datuekin alderatuta partaideen kopuru osoari dagokionez %15eko gorakada izan zuen iaz. Europak hartu zituen 252 ekitaldietan 127.303 pertsona bertaratu ziren, 2024an izandako 108.000 pertsonako kopurua hobetuz.
Bestalde, Gasteizko Udalak Artarria Obra y Rehabilitación S.L. enpresari esleitu dizkio Aiztogile kaleko 79 zenbakiko eraikina eraisteko lanak, 117.769,37 euroan, BEZa barne. Lanak egiteko epea bi hilabetekoa izango da.