Gasteizko Udaleko gobernu batzordeak Artium Fundazioari urtero egiten dion ekarpena onetsi du, eta 2026ko ekitaldiari dagokiona 130.000 eurokoa izango da, Arte Garaikideko Euskal Zentro-Museoaren jarduera babesten jarraitzeko, "hiriko erreferentzia kultural nagusietako bat baita", Gasteizko Udaletik jakinarazi dutenez.
Artium Fundazioaren patronoa da Gasteizko Udala, beste erakunde publiko eta erakunde pribatu batzuekin batera, eta bere eginkizunen artean daude museoaren balio kulturaleko ondasunak kontserbatzea, ezagutza bultzatzea, ondare artistikoa zabaltzea eta, oro har, kultura sustatzea.
Sonia Diaz de Corcuera Kultura eta Hezkuntza zinegotziak nabarmendu du "oso garrantzitsua" dela Gasteizko kultura-bizitzan funtsezko zeregina betetzen duen erakundeari erakundeek ematen dioten laguntzari eustea. "Artium gure hiriko erreferentzia kultural nagusietako bat da, eta arte garaikidea zabaltzeko ezinbesteko eragilea ere bada. Ekarpen honekin, berretsi egiten dugu Gasteiz proiektatzen eta kultura herritar guztiei hurbiltzen laguntzen duen erakunde horrekiko gure gain hartutako konpromisoa", adierazi du.
Era berean, Artium Fundazioak bere bilduma artistikoaren kudeaketatik harago egiten duen lanari balioa eman dio zinegotziak: "Artiumek funtsezko lana egiten du kultura-ondarea kontserbatzen eta zabaltzen, ezagutza sortzen eta hiriko kultura-bizitza aberasten duten proposamenak bultzatzen. Bere jarduerak Gasteiz kulturarekin, sormenarekin eta ezagutzarako sarbidearekin konprometitutako hiri gisa sendotzen laguntzen du".