Gasteizko haur eskola publikoetan matrikulatzeko epea apirilaren 13an irekiko da

Actualizado hace 8 minutos

Gasteizko titulartasun publikoko haur eskoletan izena emateko epea apirilaren 13an irekiko da, hala bost udal eskoletan, nola Haurreskolak Partzuergoaren 19 eskoletan. Guztira, 2026-2027ko ikasturterako 1.379 plaza eskainiko dira.

Zehazki, udal eskoletan 379 plaza izango dira, eta 0 eta 3 urte bitarteko haurrek eman ahal izango dute izena, hau da, 2024, 2025 eta 2026an jaiotakoek; Haurreskolak Partzuergoaren eskoletan, berriz, 0 eta 2 urte bitartekoek eman ahalko dute izena (2025ean eta 2026an jaioek); 0 urteko haurrentzako 296 plaza, urtebetekoentzat 320 eta 2 urtekoentzat 897 plaza.

"Titulartasun publikoko haur eskolen ereduak hezkuntza eta alderdi ludikoa ulertzen ditu haurren oinarrizko eskubide gisa. Haur bakoitzaren beharrei eta premia fisiko, afektibo eta emozionalei erantzuten zaie modu espezifikoan, eta (familien eskutik) haien nortasunaren garapen harmonikoa lantzen da", adierazi du Sonia Diaz de Corcuera Hezkuntzako zinegotziak.

Haur eskola publikoak doakoak dira, eta, beraz, familiek jantoki zerbitzua bakarrik ordaindu beharko dute udal haur eskoletan, hilean 36,20 euro. Eskaintzen diren menuak eskoletan bertan egiten dira eta sasoiko produktuak, ziurtagiri ekologikoa dutenak eta 0 kilometrokoak erabiltzen dituzte (Partzuergoko eskoletan familiek eramaten dute janaria).

Ikasturtea 2026ko irailean hasiko da, eta 2027ko uztailean amaitu, eta bi ordutegi egongo dira: goizekoa eta egun osokoa (udal haur eskoletan jantoki zerbitzua sartzen da). Haurrek ezin izango dute eskolan zortzi ordu baino gehiago egin.

ESKAERAK

Eskaerak eta dokumentazioa aurkezteko epea apirilaren 13tik maiatzaren 4ra bitarte izango da, eta maiatzaren 1etik 10era jaiotako umeen kasuan, maiatzaren 20ra arte zabalduko da. Maiatzaren 22an eskatzaileen zerrenda argitaratuko da, bai eta eskabide bakoitza zer egoeratan dagoen ere: osorik edo osatu gabe, falta den nahitaezko dokumentazioa zehaztuta. Dokumentazio hori maiatzaren 25etik ekainaren 5era arte zuzendu ahal izango da.

Onartutako haurren behin-behineko zerrenda eta itxarote zerrenda ekainaren 17an argitaratuko dira, eta ekainaren 26an behin betiko zerrenda eta itxarote zerrenda. Ikasturtea hasi ondoren, irailean, plaza librerik geratzen bada, familiek hilabetez hilabete eman ahal izango dute izena (hilabete bakoitzaren 1etik 8ra).

Eskabideak eta beharrezko dokumentazioa aurrez aurre aurkeztu ahal izango dira gizarte etxeetako Herritarrentzako Arreta Bulegoetan, aurretiko hitzorduarekin, eta San Antonio kalean, aurretiko hitzorduarekin edo hitzordurik gabe; online ere egin ahal izango da, Gasteizko Udalaren egoitza elektronikoaren bidez, betiere identifikazio digitaleko ziurtagiria izanez gero.

Matrikulazio prozesuan sor daitezkeen zalantzak argitzeko bi hitzaldi antolatu dira Salburua gizarte etxean: apirilaren 14an euskaraz eta biharamunean gaztelaniaz, biak ala biak 18:00etan.