Gasteizko Erdi Aroko Azoka iralaren 25tik 27ra ospatuko da

Actualizado hace 2 minutos

Gasteizko Erdi Aroko Azokaren aurtengo edizioa irailaren 25ean, 26an eta 27an egingo da, eta hirigune historikoko kaleak, plazak eta lorategiak artisautzaz, gastronomiaz, musikaz, pertsonaiez, ikuskizunez, kalejirez eta publiko guztientzako jarduerez beteko ditu, produkzio lan berriekin eta familian gozatzeko bereziki pentsatutako espazioekin.

Maria Nanclares Gasteizko Udaleko Ekonomia Sustapen, Enplegu, Merkataritza eta Turismoko zinegotziak azaldu duenez, "edizio honetako berritasun nagusia 'Thamur Erraldoiaren Herrixka' izango da. Ekoizpen bikain horri esker, publikoak mendietatik ezkutuan jaisten zen eta aparteko indarra eta bihotz zintzoa zituen pertsonaia misteriotsu horren unibertso berezian barneratu ahal izango du. Gizon misteriotsu haren asmoa herrixka txiki hartako biztanleei laguntzea izaten zen, harresiak eraikitzeko harri erraldoiak garraiatuz. Buruileria plazan gozatu ahal izango da".

Bere herrixkan, bisitariek erraldoiaren etxeko txoko bitxienetako batzuk ezagutu ahal izango dituzte, hala nola 'Thamurren Errementeria'; bertan, erraldoi batek burdina nola lantzen duen imajinatu ahal izango da. Beste toki bat 'Erraldoiaren Despentsa' izango da, eta batere ohikoa ez den eskalako objektuz, tresnaz eta elikagaiz betea egongo da. Herrixkak asteburu osoa iraungo du: istorioak, tailer parte hartzaileak, zirkua, dantzak, haurrentzako jarduerak, ikuskizunak eta pertsonaia fantastikoak izango dira.

Azokako une nagusietako bat 'Thamur Erraldoia' formatu handiko kalejira izango da, Buruileria plazatik abiatuko dena irailaren 26an eta 27an, 19:00etan. Kalejira horretan, edizio honetako protagonista azokako kaleetan zehar ibiliko da.

Irailaren 26an, toki beretik, "fantasiaz betetako" beste kalejira bat abiatuko da 13:30ean: 'Los Errantes de la Puerta Encantada'. Kalejira horrek publikoa izaki eta pertsonaia harrigarriz betetako mundu batean murgiltzera gonbidatuko du.

'OASIA'

Gasteizko Erdi Aroko Azokaren edizio honetako beste berritasun nagusietako bat Frai Zacarias udal eraikinaren ondoan egongo da: 'Oasia' haurrei zuzendutako txokoa, 'Mila gau eta bat gehiago' unibertsoan inspiratua.

Horrela, Zahra al-Fil elefanteak eta Abu al-Fil txikia Gasteizera iritsiko dira beren kokaleku bereziaren magia haurrekin partekatzeko, eta jolasez, ipuinez, jardueraz eta abentura txikiz betetako gunea izango da, familiek txikienentzat bereziki sortutako giroaz gozatu ahal izateko pentsatua.

Azokako beste leku nabarmenetako bat Erdi Aroko kanpamentua izango da. Aurten Falerina lorategian jarriko da, eta bertan Erdi Aroko eguneroko bizitza nolakoa zen gertutik ezagutzeko aukera izango dute bisitariek. Girotze historikorako gunea izango da, familia osoarentzako denda, ofizio, pertsonaia eta jarduerekin.

Gune berezi horietatik harago, Erdi Aroko Azokak programazio zabala eskainiko du hiru egunetan, hirigune historikoko hainbat tokitan banatuta. Kalejira, musika, zirkua, ipuinak, tailerrak, pertsonaia fantastikoak, emanaldi ibiltariak, antzerkia, jarduera parte hartzaileak eta haurrentzako proposamenak izango dira goizetik gauera. Artisautzak eta gastronomiak ere leku garrantzitsua izango dute, Alde Zaharreko kaleetan girotutako postu ugarirekin.

"Gasteizko erdigunea hiru egunez historiarekin eta fantasiarekin gozatzeko prestatzen ari da. Irailaren 25etik 27ra bitartean, erraldoiek, elefanteek, iratxoek, Erdi Aroko pertsonaiek, artistek eta izaki fantastikoek kaleak hartuko dituzte Erdi Aroko Azoka ezagutzeko, zeharkatzeko eta familian gozatzeko pentsatutako hitzordu bihurtzeko", adierazi du zinegotziak.

EUSKARA

Aurtengo programazioak, gainera, haurrei eta familiei zuzendutako euskarazko jardueren presentzia indartuko du. Hiru egunetan haurrentzako ipuinak euskaraz izango dira, irailaren 25ean 20:30ean, eta 26an eta 27an 17:30ean, 19:00etan eta 20:30ean.

Hilaren 26an eta 28an, 12:00etan eta 13:30ean, 'Arabiako istorioak euskaraz' ikuskizunaz gozatzeko aukera ere izango du publikoak, bai eta txotxongiloen euskarazko ikuskizunaz ere, hilaren 25ean 20:00etan, eta 26an eta 27an 18:00etan.