Gasteizko 39. Merkealdi eta Aukerako Liburu Azokak ateak ireki ditu urriaren 4ra arte

Actualizado hace 20 segundos

Gasteizko Merkealdi eta Aukerako Liburu Azokaren 39. edizioa hasi da ostiral honetan Arabako hiriburuko Urrezko Zeledonen plazan, eta urriaren 4ra arte egongo da bertan. Aurten 12 erakusketari bilduko dira, Euskadikoak zein Espainiako Estatuko hainbat tokitakoak.

Sonia Duaz de Corcuera Gasteizko Udaleko Kultura zinegotzia azokaren irekieran izan da eta datozen asteetan herritarrei hurbiltzera gonbidatu ditu. "39 edizio betetzeak erakusten du Gasteizko kultur agendan erabat finkatuta dagoen hitzorduaren aurrean gaudela. Azokak gelditzera, postuen artean bilatzera eta agian bilatzen ari ez ginen liburuekin harri eta zur geratzera gonbidatzen gaitu", adierazi du.

Euskadiko Liburu Ganberak antolatuta, ekimena Euskadiko Liburu Azoken Kanpainaren parte da, eta Eusko Jaurlaritzako Kultura Sailaren babesa eta Gasteizko Udaleko Kultura Sailaren laguntza ditu.

Hurbiltzen direnek euro batetik aurrerako liburuak aurkituko dituzte, baita obra zaharren edizio faksimileak eta liburu ezagunen eskuz egindako liburu txikiak ere. Eleberria da, oraindik ere, gehien eskatzen den generoa; dibulgazio liburuen artean, berriz, gastronomiarekin, historiarekin eta tokiko gaiekin lotutako lanak nabarmentzen dira bereziki.

"Liburu batzuek bigarren bizitza dute, eta irakurleek benetako altxor txikiak aurkitzen dituzte honelako azoketan. Egun hauetan plaza liburuen, irakurketaren eta kulturaren inguruko topaleku bihurtzea nahi dugu", gaineratu du Diaz de Corcuerak.

Gasteizko 39. Merkealdi eta Aukerako Liburu Azoka 11:00etatik 14:00etara eta 17:00etatik 20:30era egongo da zabalik egunero urriaren 4ra arte.