Gasteizko Udalak behin betiko onartu du taxi zerbitzuaren guardien egutegia arautzen duen dekretua, eta iragarri du 20 lizentzia berri sustatuko dituela, funtsezko zerbitzu publiko hori indartzeko eta hiriaren egungo beharretara egokitzeko.
Dekretua asteazken honetan argitaratu da Arabako Lurralde Historikoaren Aldizkari Ofizialean, eta maiatzaren 18an behin-behineko onarpenarekin eta jendaurreko informazio aldiaren irekierarekin hasi zen administrazio izapidea burutuz. Prozeduran zehar, banan-banan aztertu eta erantzun dira sektoreak aurkeztutako alegazio guztiak.
Udal txosten juridikoek Gasteizko Udalak guardien egutegiaren bidez zerbitzua antolatzeko duen eskumena bermatu dute. Gainera, behin betiko testuak behar bezala egiaztatutako osasun egoeren ondoriozko sei aldaketa jasotzen ditu, dagozkien alegazioak partzialki onartu ondoren.
"Dekretu hau behin betiko onartuta, sektorearekin ia bi urtez egindako elkarrizketekin hasitako prozedura amaitu dugu. Alegazio guztiak entzun eta aztertu ditugu eta, arrazoi objektiboak eta egiaztatuak zeudenean, beharrezko aldaketak sartu ditugu. Arduraz jokatu dugu, eta helburu bakarrarekin: herritarrei zerbitzu hobea bermatzea", adierazi du Beatriz Artolazabal alkateorde eta Espazio Publikoaren eta Auzoen zinegotziak.
Guardien egutegi berriak gutxienez 50 taxi bermatuko ditu, larunbat eta jaiegun bezperetako gauetan 00:00etatik 08:00etara zerbitzua emanez. Gainera, 35 ibilgailuko gutxieneko zerbitzua ezarri du igandeetan, maiatza eta urria bitartean, 13:00etatik 19:00etara, eta eguneko 24 orduetan egokitutako bi taxiren etengabeko erabilgarritasuna bermatuko du.
Araudiak malgutasun mekanismoak ere barne hartzen ditu, profesionalen arteko guardien trukea errazteko, sektoreak zerbitzua antolatu ahal izan dezan eskatutako gutxieneko estaldurari uko egin gabe.
Udalak zailtasun handienak antzeman dituen ordutegi tarteetan zerbitzuaren erabilgarritasuna hobetzeko beharrarekin lotuta dago dekretuaren onarpena. Izan ere, azken bi urteotan, 191 pertsonak aurkeztutako 411 erreklamazio jaso ditu, batez ere eskari handiko une jakin batzuetan taxirik ez zegoelako.
20 LIZENTZIA BERRIA
Dekretuaren behin betiko onarpenarekin batera, Udal Gobernuak iragarri du bigarren dekretu bat sustatuko duela 20 taxi lizentzia berri gehitzeko. Gaur egun, Gasteizek 194 lizentzia ditu, duela bi hamarkada zuen kopuru berbera, nahiz eta hiria handitu egin den, bai biztanleriari dagokionez, bai hiri-hedadurari dagokionez, eta horregatik, Udalak beharrezkotzat jo du eskaintza errealitate berri horretara egokitzea, eskariari erantzun hobea emateko eta zerbitzuaren kalitatea hobetzeko.
"Guardien dekretua beharrezkoa zen, baina ez da nahikoa bere horretan. Gasteizek taxi gehiago behar ditu eta, horregatik, 20 lizentzia berri sartzea bultzatuko dugu. Zerbitzu irisgarriagoa, modernoagoa eta prestatuagoa nahi dugu, hazi egin den eta eboluzionatzen jarraitzen duen hiriaren beharrei erantzuteko", nabarmendu du Artolazabalek.
Ogasun Saila lanean ari da zabaltze hori izapidetzea ahalbidetuko duen formula juridikoa eta lizentzia berrien esleipena arautuko duten irizpideak zehazten, zerbitzuaren kalitatea hobetzen jarraitzeko helburuarekin.
Datozen asteetan iritsiko den hirugarren neurriarekin osatuko da iragarpen hori, Udal Gobernuak Taxiaren Udal Ordenantza berriaren proiektua onartuko baitu. Zehazki, ordenantza hori izapidetzen hasiko da, eta zerbitzuaren esparru arautzailea eguneratuko du, Gasteizko egungo errealitatera egokitzeko.