Gabonetako egitaraua anitza izango da Mallabian

Actualizado hace 10 minutos

Mallabia Gabonetako giroan murgildu da, eta horretarako egitarau berezia antolatu du abenduaren 18tik urtarrilaren 4ra bitartean. Udalak eta Jai Batzordeak elkarlanean osatutako programak adin guztietako herritarrentzat pentsatutako jarduerak biltzen ditu.

Egitaraua abenduaren 18an hasiko da, Gabonetan dolua nola bizi aztertuko duen hitzaldiarekin, Iñaki Peña adituaren eskutik. Bestalde, abenduaren 19an, kirolak protagonismoa hartuko du 12 urtetik gorakoentzako mahai-tenis txapelketarekin, eta abenduaren 21ean ‘Aitatxo’ dokumentala proiektatuko da herriko frontoian.

GABON GAUA

Haurren artean gehien espero diren hitzorduak abenduaren 23an eta 24an iritsiko dira. Lehenengo egunean, eskolako ikasleek kaleak Gabonetako kantuz beteko dituzte eta Olentzero eta Mari Domingi eskolara joango dira; hurrengo egunean, Galtzagorriek opariak banatuko dituzte frontoian.

Bestalde, abenduaren 27an, Mendibil Abesbatzarekin batera egingo den baserriz baserriko kantu errondak eta hurrengo egunean ospatuko den ‘Harri Herri Bidea’ harri-jasotze erakustaldiak tradizioari lotutako jarduerak ekarriko dituzte.

Urtarrilaren hasieran, gazteentzako Gabonetako parkeak zabalduko dira herriko frontoian, eta egitarauari amaiera emateko, urtarrilaren 4an, Gabonetako Superigandeak ospatuko dira, kirol partidekin eta haurrei zuzendutako hainbat ekitaldi desberdinekin.