Euskal Autonomia Erkidegoko (EAE) eraikuntzaren kostuen indizea %0,3 handitu da otsailean aurreko hilaren aldean, eta %3,4ko gehikuntza izan du 2025ko otsailarekin alderatuta, Eustat euskal estatistika erakundeak landutako datuen arabera.
Sektoreka, hil arteko bilakaerak erakusten du kostuak igo egin direla eraikingintzan (%0,2) zein ingeniaritza zibilean (%0,7). Joan den urteko otsailaren aldean, berriz, kostuak %3,2 igo dira eraikingintzaren sektorean eta %4,2 ingeniaritza zibilarenean.
Kontsumitutako lehengaiei dagokienez, kostuak %0,4 handitu dira otsailean aurreko hilaren aldean, eta urtetik urterako datuak kontuan hartuta, %2,9. Tipologiaren arabera, hilabete arteko aldakuntzak %0,3 egin du gora eraikingintzan eta %0,9 ingeniaritza zibilean; urtetik urtera, ordea, lehengaien kostuak %2,7 igo dira eraikingintzan eta %4,0 ingeniaritza zibilean.
Azkenik, azpisektoreen artean, igoerarik handiena material eta ekipo elektrikoen fabrikazioan izan da, %7,8koa; aitzitik, koke lantegiak eta petrolio fintzea adarrak %8,5eko beherakada izan du kontsumitutako lehengaien prezioetan.
Bestalde, Eusko Jaurlaritzako Industria, Trantsizio Energetiko eta Jasangarritasun Sailak 54 milioi euro erabiliko ditu Euskal Autonomia Erkidegoko (EAE) ETEen inbertsioak bultzatzeko laguntzetan, produkzio ahalmenak handitzeko, negozio lerro berriak irekitzeko edo sektore eta merkatu berrietara iristeko asmoz.
SPRI Taldeko iturriek ohar baten bidez jakinarazi dutenez, aurreko ‘Indartu’ eta ‘Gauzatu Industria’ laguntza programak biltzen dituen ‘Dibertsifika’ programaren bitartez jarri dira ETEen zerbitzura laguntza horiek.