Gasteizko Udalak 'Elkarrekin bizitzen ikasi' programa jarriko du martxan 2026-2027 ikasturtean ere, eta doako 15 jarduera antolatuko ditu. Antzerkia, zinema, prestakuntza saioak, tailerrak, irakurketa klubak eta bisita gidatuak izango dira, gasteiztarrek beren burua berrikusteko, ikasteko eta gero eta ingurune inklusiboagoak, errespetuzkoagoak eta diskriminaziorik gabekoak sortzeko aukera izan dezaten, Pascual Borja Bizikidetza eta Aniztasunaren zinegotziak astelehen honetan egindako prentsaurrekoan iragarri duenez.
"Aniztasuna ez da salbuespena: gure gizartearen parte den errealitatea da. Hala ere, gure izateko, bizitzeko edo munduari begiratzeko modua araua dela sinesten jarraitzen dugu maiz, eta ustezko normaltasun horretatik behatzen dugu errealitatea. Baina munduan bizitzeko eta beste errealitate batzuk ezagutzeko modu asko daude, eta horrek gure ziurtasunak zalantzan jartzen eta begirada zabaltzen laguntzen digu", adierazi du.
Programazioa hasteko, zurrumurruen aurkako oinarrizko prestakuntza emango zaie herritarrei, "komunitatean pentsatzeko eta gizarte kontziente eta aktiborako bideari ekiteko gonbidapena eginez". Lau saio izango dira, hezitzaile desberdinek gidatuta, eta arrazakeria estrukturala, feminismoaren eta arrazismoaren aurkakoaren arteko elkargunea, islamofobia eta nola bihurtu aldaketaren parte jorratuko dituzte, besteak beste. Saio guztiak 18:00etan izango dira Zabalgana gizarte etxean.
Azaroaren 9an, Marra Ngomek 'Del prejuicio individual al racismo estructural' saioa eskainiko du, eta 10ean, Anita Hichaicotok 'Identidad, migración y desarraigo: comprender para convivir desde una mirada antirracista' hitzaldia. Azaroaren 16an, Hajar Samadik 'Convivencia en tiempos de islamofobia' gaia jorratuko du, eta 17an, Jese Hernandezek herritarrak bultzatuko ditu arrazismoaren aurrean posizionatzera.
Agendarekin jarraituz, abenduaren 1ean, 'Gordas, lisiadas y mamarrachas' antzezlana izango da Zabalgana gizarte etxeko ekitaldi aretoan, 19:00etan, eta hilaren 12an, Gasteizko memoria ezagutzeko aukera izango da 'Conexiones colonialista y esclavistas Km0' bisita gidatuarekin, 11:00etan Arabako Arte Ederren Museotik abiatuta.
2027
Programazioak 2027ko urtarrilaren 30ean jarraituko du, 'Barrios con Historia: Zabalgana' bisitarekin, 10:00etan, Kristina Pozo historialariaren eskutik, eta urteko lehen hiruhilekoan 'Un barrio para todas' antzerki sozialeko tailerra egingo da Ariznabarran, Teatro PorPol antzerki taldeko Gentzane Martinez de Castaferen dinamizazioarekin.
Gainera, zinemazaleek 'Auzocine: cine en el barrio' zine forumarekin gozatu ahal izango dute otsailaren 18an Arana gizarte etxean eta martxoaren 18an Arriaga gizarte etxean. Bi saioak 18:00etan izango dira.
Martxoan Zurrumurruen Aurkako Laborategia egingo da, Leticia Urretabizkaiarekin. Astearteetan izango da, 18:30ean, Zabalgana gizarte etxean, eta parte hartzen dutenek programaren ekintza berri bat diseinatuko dute modu kolektiboan (aurrerago iragarriko da).
Bestalde, Ignacio Aldecoa Kultur Etxeak 'Lecturas desde el giro descolonial' irakurketa kluba hartuko du, Victoria Rodriguezekin. Martxoaren 15ean eta apirilaren 19an izango dira saioak, arrazializatutako pertsonei edo atzerritar jatorriko migrazio esperientziaren bat bizi izan dutenei zuzenduta, eta martxoaren 17an eta apirilaren 21ean pertsona zuriei zuzenduta.
Jarduera honetan landuko diren liburuak izango dira Bronislawa Wajsen 'Papusza. El bosque, mi padre' eta Reni Eddo Lodgeren 'Por qué no hablo con los blancos sobre racismo'.
La Fatal kolektiboaren 'Bisila' antzerki solasaldia dago agendan, maiatzaren 14an, Federico Garcia Lorca antzokian, eta amaitzeko, Gasteizko Udalak 'Azúcar' saltsa deskolonialaren tailerra eskainiko du, Ariana Larrondorekin, maiatzaren 6, 13, 20 eta 27an eta ekainaren 3 eta 10ean, 18:00etan, Emakumeen Etxean.
Hitzordu horien osagarri gisa, 'Aktiba (tu) zure ataria' jarriko da martxan berriro, auzo komunitateetan bizikidetza positiboa bultzatzea helburu duen proiektu komunitarioa, gida interesgarri baten laguntzarekin.