Dirdaia eta Makriba taldeek irabazi dute Gasteizko Gazte Talent 2025 lehiaketa

Actualizado hace 9 minutos

Dirdaia eta Makriba taldeak dira Jimmy Jazz elkarteak eta Gasteizko Udaleko Gazteria eta Kultura zerbitzuak antolatzen duten Gazte Talent talde eta bakarlari gazteen 11. lehiaketaren irabazleak. Lehenak Laboral Kutxa Gazte Talent saria jaso du, 25-35 urteko kategoriari dagokiona, eta bigarrenak Gazte Talent saria jaso du.

Lehiaketako sari nagusekin batera, euskarazko talde onenaren accesita Nun taldearentzat izan da, eta emakumezkoen presentzia duen talde onenarena Deus Ez bandak eskuratu du.

Antolatzaileek jakinarazi dutenez, aurtengo ediziora aurkeztutako 41 proposamenetatik, aukeraketa batzordeak Dalton & Co, Dirdaia, Deriba, Deus Ez, Nun eta Makriba taldeak aukeratu zituen finalerako. 27 proposamen 14 eta 24 urte bitartekoen kategorian aurkeztu ziren, eta 14 izan ziren 25 eta 35 urte bitartekoen kategorian.

Finalak abenduaren 8an eta 9an izan ziren, arratsaldez, Jimmy Jazz aretoan, Sara Alonso aurkezleak dinamizatuta. Jorge Gonzalez musikari, kazetari musikal eta managerrak, Irantzu Martinitz-Xil musikologo eta musika irakasleak eta Xabier Arratibel musikari eta argiztapeneko teknikariak osatutako epaimahaia ere bertan izan zen.

Epaimahaiaren erabakia publiko gisa kontzertuetara joandakoek emandako botoarekin osatu zen, eta, hala, herri bozketa bidez jasotako botoak ere zenbatuta, Dirdaia taldea izan zen irabazlea abenduaren 8an, eta Makriba abenduaren 9an.

Talde irabazleek 1.000na euro jasoko dituzte eta Andre Maria Zuriaren jaietan Falerina Lorategiko programazioan jotzeko aukera izango dute (ordainsaria jasota). Accesiten kasuan, 500 euro jasoko ditu talde bakoitzak, eta Gazte Plaza ekimenean eta Araba Euskaraz-en jotzeko aukera izango dute, Nun bandaren kasuan (euskarazko ataleko accesita), eta Armentiako zelaietan, Arabako Foru Aldundiak antolatutako San Prudentzio jaietan, Deus Ez taldeak (emakumezkoen presentzia dutenen ataleko accesita).

Gainera, Jimmy Jazz aretoko talde teknikoak datozen asteetan erabakiko du zer taldek izango duen aretoan antolatutako musika egonaldia egiteko aukera. Egitasmoaren helburua da kontzeptu teknikoak eta ekoizpenekoak finkatzea musikarien artean.