Biodibertsitatea Kontserbatzeko Gasteizko bigarren Estrategiak udal-lurraldeko babestutako naturaguneak % 30eraino handitzea jasotzen du

Actualizado hace 56 segundos

Biodibertsitatearen kontserbazioa funtsezko faktoreetako bat da gizateriaren ongizatea bermatzeko eta, horregatik, Vitoria-Gasteizek 2015ean onartu zuen Biodibertsitatea Kontserbatzeko lehen Estrategia, hamarkada batez indarrean egon dena.

Azken hilabeteotan, Eraztun Berdearen eta Biodibertsitatearen unitateak haren gauzatze maila ebaluatu du, lortutako helburu guztiak laburbiltzen dituen dokumentua prestatuz. Horrez gain, 2026 eta 2035 bitartean egin beharrekoak sakondu ditu.

Hurrengo hamarkadarako ezarritako helburuei dagokienez, zeregin nagusietako bat babestutako naturaguneen azalera handitzea da, udal-lurraldearen % 30era iritsi arte. “Gaur egun, udal-lurzoruaren % 20 baino gehiago Natura 2000 Sarearen barruan dago, eta estrategia berriak naturagune babestuen azalera handitzea planteatzen du, udal-biodibertsitatea kontserbatzeko funtsezkoak diren elementu horiek sustatzeko eta dibertsifikatzeko”, azaldu du Maider Etxebarria Gasteizko alkateak.

Estrategia berri horri 2035. urtera arte jarraipena emateko beharraren arrazoia honako hau da: “konpromiso berriak, hala nola Europako araudi eta estrategiekin lerrokatzeko beharra, hala nola Natura Berrezartzeko Araudia, azken hamarkadan sortu edo areagotu diren arrisku berriak, eta aurreko dokumentua indarrean egon zen bitartean aurrerapen nahikorik izan ez zuten erronka eta ekintzei jarraipena ematea”.

Biodibertsitatea Kontserbatzeko Bigarren Estrategiaren azken helburua da “udalerriko habitaten eta espezieen kontserbazio-egoera ona lortzea, haien balioak eta gizartearen mesedetan betetzen dituen funtzioak aintzatetsiz”.

8 jarduera esparru eta 124 ekintza

Esparru horietako lehenak naturaguneen funtzionaltasuna hobetzea du helburu, korridore ekologiko egokien bidez elkarren artean lotuz eta naturagune babestuen hazkundea sustatuz.

Beste esparru bat udal-habitat nagusiak kontserbatzea, kudeatzea eta lehengoratzea da, eta honako neurri hauek bideratuko dira: “hezeguneen azalera handitzea, hezeguneak babesteko eta antolatzeko mekanismoak bultzatzea, uraren kalitatea eta kantitatea hobetzeko hezeguneen kudeaketa optimizatzea, eta hezeguneen biodibertsitatea sustatzea”. Ildo horretan, Zadorra ibaiak eta haren ibaiadarrek kalitate ekologiko ona lortzeko neurriak bultzatzea eta ibai-ekosistemak lehengoratzeko proiektuak sustatzea ere helburu izango dira. Jarduera esparru horrek beste erronka batzuk ere barne hartzen ditu: baso autoktonoen azalera handitzea, nekazaritza-inguruneetan biodibertsitate handiko paisaia-elementuak sustatzea edo hiri-azpiegitura berdearen azalera handitzea, haren funtzionaltasun ekologikoa hobetuz.

Espezie autoktonoen kontserbazioari dagokionez, honako hauek proposatu dira: kontserbaziorako interes handiena duten espezieentzako tokiko ekintza-planak bultzatzea, espezie basatien kontserbazio-egoera hobetzeko beharrezko jarduerak gauzatzea, populazio exotiko inbaditzaileen presentzia kontrolatzea edo desagerraraztea edo bertako faunaren presioa murriztea, populazioen kudeaketa arduratsuaren eta erregulazioaren bidez.

Estrategia berriak, halaber, honako premia honetan sakontzen du: “udal-biodibertsitateari buruzko ezagutza zientifikoa sortzea eta zabaltzea, informazioaren eskuragarritasuna hobetzea, hedapenaren eta herritarrei zuzendutako prestakuntzaren xede diren gaiak dibertsifikatzea eta jarrera eta portaera arduratsuak bultzatzea herritarren aktibazioaren bidez”.