Bilbobusek eta funikularrak % 50eko hobaria emango diete bidaiei

Bilboko Udalak eta Eusko Jaurlaritzak ostegun honetan iragarri dutenez, Bilbobuseko eta funikularreko bidaiek ere % 50eko hobaria izango dute. Lehenengoaren kasuan, barik ez dauden bidaiei ere aplikatuko zaie. Era berean, neurria gaur argitaratu da Bizkaiko Aldizkari Ofizialean, eta irailaren 1etik abenduaren 31ra arte egongo da indarrean.

Irailaren 1ean hasita, Barik txartela erabiltzen duten Bilbobuseko erabiltzaileentzako txartelaren prezioa 0,33 eurokoa izango da bidaia bakoitzeko; gaur egun 0,66 eurokoa da. Creditrans bonua erabiltzen duten kategoria orokorreko familia ugarien kasuan, Bilbobusen bidaiaren prezioa 0,24 eurokoa izango da (egungo 0,48 euroen aldean), eta 0,16 eurokoa kategoria bereziko familia ugarientzat (gaur egun, 0,32 euroko kostua du bidaia bakoitzak).

Bestalde, Gizatrans-en erabiltzaileari (65 urtetik gorakoentzako bonu espezifikoa) Bilbobusen egindako bidaia bakoitzaren prezioa 0,16 eurora jaitsiko zaio (gaur egun, aldiz, 0,32 euro ordaintzen ditu bidaia bakoitzeko). Era berean, txartel hobariduna duenak ere 0,16 euro ordainduko du bidaia bakoitzeko; gaur egun 0,32 euro ordaintzen du bidaia bakoitzeko.

Bilbobusen garraiatzeko Gazte BIo erabiltzen duten 26 urtetik beherakoek ere ere deskontu handia izango dute tarifan. Irailaren 1etik aurrera, Gazte Bioren erabiltzaileek 16,50 euro ordainduko dute Bilbobusen hileko bonoaren truke. Zenbateko hori hilean 13,20 eurokoa izango da familia ugarien kategoria orokorrekoak diren Gazte Bio erabiltzaileen kasuan; kategoria bereziko familia ugarien kasuan, berriz, ezarritako prezioa hilean 8,25 eurokoa izango da.

Gautxoriaren kasuan, txartelaren prezioa (Barikekin soilik ordaintzen dena) 0,33 eurokoa izango da.

Artxandako Funikularrean, Barik txartelarekin ordainduz gero, bada, txartelaren prezioa 0,32 eurokoa izango da bidaia bakoitzeko (orain arte 0,65 euro).