Basque Team Fundazioak 1,4 milioi euro banatuko ditu goi mailako kirola sustatzeko beka eta laguntzetan

Actualizado hace 9 minutos

Eusko Jaurlaritzako gobernu kontseiluak Basque Team Fundazioak 2026. urtean goi mailako kirola sustatzeko emango dituen beka eta laguntzen oinarri arautzaileen deialdiak onetsi ditu astearte honetan, eta guztira 1.432.300 euro bideratuko ditu, Basque Team Fundazioaren bidez, bi deialditara.

Hain zuzen, Jaurlaritzatik jakinarazi dutenez, alde batetik, Basque Team beketara 1.027.300 euro bideratuko dira, iaz baino %3,6 gehiago. Deialdi honen bidez, Basque Team Fundazioak 2026an kirolariei, kirol teknikariei eta nazioarteko lehiaketetan jarduten duten epaileei zuzendutako beka programa kudeatzeko oinarriak onartu dira.

Beken helburua da euskal kirolarien prestakuntza eta lehiaketa nazioarteko ekitaldi nagusietan bultzatzea, bereziki programa olinpiko eta paralinpikoan sartzen diren diziplinetan. Beken deialdiaren balorazioan kontuan hartuko dira 2025eko urtarrilaren 1etik abenduaren 31ra arteko nazioarteko emaitzak. Salbuespen gisa, bekari eusteko aintzat hartuko dira haurdunaldia, lesio larriak edo osasunarazo luzearen ondoriozko ezintasuna.

Beka programaren bost modalitate daude: Basque Team Kirolariak (programa olinpikoa eta paralinpikoa), Basque Team Teknikariak, Atzeraeraginezko Basque Team, Basque Team Support eta Basque Team Epaileak.

Bestalde, kirol erakundeei zuzendutako laguntzetara 405.000 euro bideratuko dira Basque Team Fundaziotik. Deialdi honen bidez, Euskal Autonomia Erkidegoko (EAE) kirol erakundeen 2026an goi mailako kirol proiektuak lagunduko dira, eta, hala, kirol erakundeek kirolarien prestakuntzan eta nazioarteko lehiaketetarako prestaketaegituretan duten eginkizuna sendotu nahi da.

Bi agindu hauen bidez, Eusko Jaurlaritzak, Basque Team Fundazioaren bidez, euskal goi mailako kirolaren garapena eta nazioarteko presentzia indartzeko duten konpromisoa berresten du.