Auzoen Hiria Planak 219 jarduketa biltzen ditu, eta 42,8 milioi euro baino gehiago ditu mobilizatuta

Abian jarri eta bi urtera, Auzoen Hiria Plana aurrez ikusitako 70,1 milioi euroko inbertsiora iritsi da, eta dagoeneko bere baliabideen % 75,75 aktibatuta ditu. Guztira, Vitoria-Gasteizko Udalak 42,8 milioi euro ditu exekutatuta, esleituta edo kontratatuta. Horri esker, esan dezakegu planean aurreikusitako lau eurotik hiru auzoak eta landagunea hobetzeko jarduketa zehatzetara bideratu direla dagoeneko. Gainera, dokumentua 2024an sortu zenetik 56,4 milioi eurokoa eta 203 jarduketakoa izatetik, 70,1 milioi eurokoa eta 219 jarduketakoa izatera igaro da.

“Auzoen Hiria aurkeztu genuenean esan genuen gure auzoetako egunerokotasuna hobetzeko tresna erabilgarria nahi genuela. Bi urte geroago, esan dezakegu oraindik ere bizirik dagoen plana dela, behar berrietara egokitzeko gai dena, baina baita hiri osoan emaitza ikusgarriak ematen ari den plana ere”, nabarmendu du Beatriz Artolazabal Espazio Publikoaren eta Auzoen zinegotziak.

Gaur egun, planak 111 jarduketa aktibo ditu, Gasteizko 28 auzoetan eta landagunean banatuta. Gauzatutako edo aktibatutako esku-hartzeen artean, nabarmentzekoak dira honako hauek: Erdi Aroko hiriguneko arrapala mekanikoak eta igogailuak berritzea eta eguneratzea, Abetxukun eta Adurtzan haur-parkeak eraberritzea, Aranbizkarra eta Batanen bizikleta-konexio berriak egitea, Goikolarran Bustaldeko bidea egitea, Santsomendin eraikitako aparkaleku berriak edo Salburuan Gabriela Mistraleko kalistenia eremua berritzea. Landagunea ere protagonista izan da plan honetan, hainbat kontzejutan jolaserako espazioak handitu eta ekipamenduak hobetu baitira.

“Garrantzitsuena ez dira zifrak bakarrik. Garrantzitsuena da inbertsio horiek pertsonentzako hobekuntza zehatzak ekartzen ari direla egiaztatzea. Irisgarritasunaz, mugikortasunaz, bide-segurtasunaz, haur-parkeez edo gure auzoetako eguneroko bizitzaren parte diren topaguneez ari gara”, azaldu du Artolazabalek.