Arabako Museoen Foru Sareak bisitak eskainiko ditu Aste Santuan, Iruña Veleia eta Kexaako monumentu multzoa barne

Arabako Museoen Foru Sareak Aste Santuko programazio berezia antolatu du, Iruña Veleia aztarnategia eta Kexaako monumentu multzoa barne hartuta, eta, bisita gidatuak eta familian egiteko bisitak eskainiko ditu apirilaren 17tik 27ra.

Arabako Foru Aldunditik jakinarazi dutenez, guztira 11 jarduera izango dira, guztiak doakoak, eta ez da aurrez izenik eman behar, baina kontuan izan behar da tokiak mugatuak direla.

Kexaako monumentu multzoa bisitatzeko, aldiz, erreserba egin behar da 945 101 070 telefonora deituta edo reservas@kalearte.com helbide elektronikora idatzita. Apirilaren 17tik 21era, apirilaren 26an eta 27an eta maiatzaren 1etik 4ra izango dira bisitak.

Ana del Val Kultura eta Kirol Saileko diputatuak adierazi duenez, "Aste Santuan turista asko etortzen dira bisitan gure museoetara, eta bertokoentzat ere aitzakia ezin hobea da gure museoetara berriro etortzeko, askotariko jarduerak izaten baitira. Hori dela eta, haietakoren bat egitera animatzen ditut herritarrak".

Eusko Jaurlaritzak eta Arabako, Bizkaiko eta Gipuzkoako foru-aldundiek EAEko Nekazaritza Sektorearen Belaunaldi Erreleborako Estrategia Integral berria aurkeztu dute gaur goizean. Ekimen “anbiziotsua eta eraldatzailea” da, eta landa-ingurunearen jasangarritasunerako funtsezkoa den sektore bati jarraipena ematea du helburu, gazte gehiago sartuz, bai eta lurralde-oreka lortzea ere. Estrategia datozen hiru urteetarako 25 milioi euroko aurrekontu bateratuarekin sortu da, eta hamar urtean sektorean 1.250 gazte sartzea espero da.

Plana dimentsio ekonomiko errentagarria duten eta titularrak erretiratuta edo erretiroa laster hartzekotan dituzten 1.500 nekazaritza-ustiategitan ardazten da. Kalkuluen arabera, 750 inguruk ez dute identifikatutako erreleborik, eta horrek arriskuan jartzen du horien jarraipena epe labur eta ertainean. Ustiategi horiek dira lehentasunezko jarduera guneak.

Bide-orria

Estrategia esku hartzeko funtsezko zortzi arloren eta 22 neurri zehatzen inguruan egituratzen da, eta belaunaldi-erreleboan eragiten duten faktoreei heltzen diete, besteak beste oztopo administratibo eta finantzarioei eta lehen sektorearen aitorpen sozialik ezari.

Amaia Barredo Eusko Jaurlaritzako Elikadura, Landa Garapen, Nekazaritza eta Arrantzako sailburuak zehaztu duenez, “bost jarduera aipagarrienen artean daude bi sentsibilizazio-kanpaina abian jartzea lehen sektoreak euskal ekonomian duen balio estrategikoa ikusarazteko eta nekazaritza-bokazio berriak erakartzeko; foru-aldundiek ustiategien bitartekaritza-bulegoak, erreleborik ez duten lagatzaileen eta sektorean sartu nahi duten gazteen arteko topagune izango direnak, sortzea; eta Gaztenek programa berrikustea eta indartzea, nekazari gazte berriak instalatzean eraginkortasuna hobetuz”.