Arabako Foru Aldundiak 169.115 euro banatuko ditu laguntzetan pertsonak eta salgaiak garraiatzen dituzten lurraldeko profesional autonomoen eta enpresen artean. Hidrokarburoen gaineko zergaren zati baten itzulketa jaso ezin duten profesional autonomoei eta enpresei konpentsazio ekonomikoa emateko Espainiako Gobernuaren programaren barruan daude laguntzak.
Foru erakundetik jakinarazi duenez, Ekialde Ertaineko Krisiari Erantzuteko Plan Integrala onesten duen Espainiako Gobernuaren martxoaren 20ko 7/2026 Errege Lege Dekretuak araututako garraio sektorerako laguntzen urteko lehen deialdia ebatzi du Mugikortasun Jasangarriaren eta Bide Azpiegituren Sailak. Plan horrek jasangarritasun energetikorako, industriari laguntzeko eta gizarte babeserako zenbait neurri jasotzen ditu.
Bada, Arabako Foru Aldundiak deialdia kudeatu eta diru laguntzak aurreratzen ditu, eta, ondoren, Estatuaren konpentsazioak jasotzen ditu. Horrela, eskaerak aurkezteko epea amaituta, Foru Gobernuak onetsi du 169.115 euro banatzea laguntzetan egoitza Araban duten garraio sektoreko 286 profesional autonomo eta enpresaren artean.
Laguntzen hartzaileak pertsonak eta salgaiak garraiatzen dituzten profesional autonomak eta enpresa pribatuak dira (taxilariak, gidariarekin alokatzeko ibilgailuen titularrak, bidaiariak autobusen bidez garraiatzeko enpresak, anbulantziak eta salgaiak garraiatzen dituzten autonomoak eta enpresak), baldin eta, zerga egoitza Araban izanik, gasolio profesionalaren hidrokarburoen gaineko zergaren zati baten itzulketaren onuradun ez badira. Laguntzen zenbatekoa profesional edo enpresa onuradunak ustiatutako ibilgailu motaren eta kopuruaren araberakoa da.
Arabako Foru Aldundiko Mugikortasun Jasangarriaren eta Bide Azpiegituren Sailak zuzeneko diru laguntzen beste deialdi bat du zabalik, erabilera profesionaleko gasolioaren hidrokarburoen gaineko zergaren zati baten itzulketaren onuradun ez diren garraio sektoreko profesional autonomoentzako eta enpresentzako. Eskaera Arabako Aldundiaren egoitza elektronikoan aurkez daiteke urriaren 30era arte.