Arabako Foru Aldundiko gobernu kontseiluak Armiñongo lotunea handitzeko lanen bigarren fasearen lizitazioa onetsi du astearte honetan, 20.927.183 euroko oinarrizko aurrekontuarekin (BEZa barne) eta 30 hilabeteko egikaritze epearekin. Obrak urtea amaitu baino lehen hasiko dira eta elkargune berria 2029an egongo da erabilgarri.
Foru erakundeak jakinarazi duenez, Armiñongo lotunea handitzeko lanen bigarren fasean, AP-1 eta A-1 autobideek Gasteizerako noranzkoan bat egiten duten egungo bi erreikoa gunea hiru erreikoa izango da eta haren trazadura hobetuko da, zirkulazio gaitasuna handitzeko eta egunero dozenaka mila ibilgailu ibiltzen diren gune horren segurtasuna hobetzeko. 2025eko ekainean abiatu zen Burgos/Madrilerako noranzkoa hobetzeko lehen fasearen jarraipena dira lanak.
Proiektuak AP-1en enborra bi erreikoa izatetik hirukoa izateko handitzea aurreikusten du, Gasteiz/Irun noranzkoan, 1.500 metroko tarte batean. Horretarako, Armiñongo lotunearen ekialdeko biribilgunearen gainean dauden bi zubiak aldatu beharko dira, eta AP-1en azken zatiaren trazadura indarrean dagoen araudira egokitu beharko da, 120 km/h-ko proiektu abiadurarako, eta bihurgunea eta kontra bihurgunea ezabatuko dira lehengo ordainlekuko zabaltzan. Gainera, obra horiekin, AP-1 eta A-1 errepideek bat egiten duten tokia hobetuko da, bost erreiak hirura murriztuz 1.500 metrotan zehar.
Obrak gauzatzean Armiñongo lotunea handitzeko proiektua amaituko da. Lehenengo fasea 2024an eta 2025ean egin zen, eta 2025eko ekainean inauguratu, bost milioi euroko inbertsioa egin ondoren. Lehenengo fasean, errei batetik bira handitu zen A-1 eta AP-1 autobideen arteko lotura, Burgos/Madrilerako noranzkoan, gune horretan Aste Santuan eta udako oporretan sortzen ziren auto ilarak konpontzeko.
Armiñongo lotunea handitzeko bigarren fasearen kostua Espainiako Gobernuak finantzatuko du osorik, lehenengo fasearekin egin zen bezala, Mugikortasun Jasangarriaren eta Bide Azpiegituren Sailak eta Garraio eta Mugikortasun Jasangarriaren Ministerioak 2022an Armiñóngo lotunea handitzeko obrak bultzatzeko sinatu zuten hitzarmenean adostu bezala.