Arabako Foru Aldundiko Gizarte Politiken Sailaren mendeko Gizarte Ongizaterako Foru Erakundearen administrazio kontseiluak desgaitasun egoera aitortuta duten pertsonei zuzendutako banakako laguntzen deialdia onetsi du eta 160.000 euro banatuko ditu. Eskaerak aurkezteko epea astelehen honetan hasi da, martxoaren 23an, eta irailaren 15ean bukatuko da.
Foru erakundeak jakinarazi duenez, laguntzen xedea da onuradunen bizi kalitatea hobetzea, desgaitasun egoeran egoteak pertsona horiei sortzen dizkien beharrak asetzea, eta beren autonomia, garapen pertsonala eta gizarteratzea sustatzea.
Horretarako, laguntza produktu baten erabilera lagapena edo laguntza produktua eskuratzeko eta ohiko etxebizitzan edo ibilgailu partikularrean egokitzapenak egiteko laguntza ekonomiko bat emango zaie. 2025eko irailaren 16tik 2026ko irailaren 15era bitartean eskuratutako edo egindako laguntzak finantzatuko dira.
Iaz 174 diru laguntza eman ziren. Zenbateko handienak laguntza produktuetara bideratu ziren, hala nola gurpil aulki, ibilgailuen egokitzapen, garabiak eta ohe artikulatuetara, audifono eta betaurrekoetara, eta etxebizitzen irisgarritasunerako laguntzetara.
Diruz laguntzeko moduko laguntzen katalogoan ohiko etxebizitzarako irisgarritasuna ahalbidetzen dutenak sartzen dira, hau da, arkitektura oztopoak kentzeko laguntzak, hala nola igogailuak jarri edo aldatzea, arrapalak egitea, jasogailuak jartzea, 0 kotako igogailuak jartzea atarietan, edo etxebizitzako bainugelak, ateak eta korridoreak egokitzea.
Era berean, etxeko lanak eta zaintza pertsonala egiteko eta komunikazioa eta informazioa errazteko laguntza produktuak diruz laguntzen dira, hala nola betaurrekoak, lentillak, audifonoak edo Braille idazteko ekipoak erostea. Azkenik, diruz laguntzeko moduko produktuak dira norbere mugikortasunari laguntzen dioten produktuak, hala nola gurpil aulkiak eta ohe artikulatuak, eta ibilgailuak egokitzea, besteak beste.