Arabako Foru Aldundiak emakumeen kirola sustatzeko 2026rako diru laguntzen deialdia argitaratu du Arabako Lurralde Historikoaren Aldizkari Ofizialean (ALHAO), eta 30.000 euroko kontu saila izango du. Eskaerak aurkezteko epea apirilaren 30ean amaituko da.
Foru erakundetik jakinarazi dutenez, kirolean berdintasuna lortzeko bidean aurrera egiten jarraitzea da deialdiaren helburua, Arabako kirol federatuan "nabarmena" baita genero arrakala: 2024an, emakumeen lizentziak guztizkoaren %27,78 baino ez ziren.
Gainera, Arabako Aldundiaren arabera, emakumeen parte hartzea tradizioz feminizatuta egon diren diziplina jakin batzuen inguruan biltzen da oraindik ere, eta "horrek agerian uzten du egiturazko desberdintasunak dirauela kirol munduan murgildu eta jarduteari dagokionez".
Testuinguru horretan, Arabako Foru Aldundiak ekintza positiboko neurri gisa bultzatzen ditu laguntzaak, emakumeek kirol modalitate guztietan eta maila guztietan parte har dezaten sustatzeko, euren aisialdian zein lehiatzeko mailan.
Diru laguntzen helburua da emakumeen kirola sustatzeko programak eta jarduerak garatzen dituzten Arabako erakundeei ekonomikoki laguntzea, eta, horren bidez, emakumeen aukera berdintasuna eta kirol praktikan erabat integra daitezen lortzen laguntzea.
Laguntzak norgehiagoka bidez emango dira, Kultura eta Kirol Sailaren diru laguntzen oinarri orokorren arabera, eta deialdia ebazteko epea sei hilabete izango da gehienez, Arabako Lurralde Historikoaren Aldizkari Ofizialean argitaratzen denetik zenbatzen hasita.