Amaia Zubiriak jasoko du 2025eko Monzon-Ganuza saria, euskal kultura eta musikagintzari egindako ekarpenagatik

Olaso Dorrea Fundazioak eta Bergarako Udalak Amaia Zubiria musikariari eman diote 2025eko Monzon-Ganuza saria, euskal kulturari eta musikagintzari egindako ekarpena aitortzeko.

Olaso Dorrea Fundazioko lehendakari Iratxe Esnaolak eta Bergarako alkate Gorka Artolak sariduna aurkezteko agerraldian adierazi dute Amaia Zubiriaren ibilbidea "euskal kulturarentzat aberasgarri" izan dela, eta saria esker ona eta miresmena adierazteko modu bat dela.

Telesforo Monzonen heriotzaren 40. urteurrenaren testuinguruan, Monzon-Ganuza sariak Euskal Herriaren kulturari, hizkuntzari, historiari eta etorkizunari bizitza osoan zehar ekarpena egin dieten pertsonak omendu nahi ditu.

Aurreko edizioetan Libe Goñi, Xabier Amuriza, Jose Luis Elkoro, Mari Karmen Ayastuy eta Jose Mari Esparza izan dira sarituak, eta aurten Amaia Zubiria izango da aintzatespena jasoko duen artista.

Sariaren arduradunek nabarmendu dutenez, Amaia Zubiria euskal musikaren historian "ezinbesteko figura" da. Bere "ahots gardena eta interpretazio sentikorra" ezagunak dira, eta Haizea taldearekin hasi eta bakarkako ibilbidean euskal musika tradizionala berritu du.

"Herri kantak, jazza, poesia eta zinema musika uztartuz, hainbat belaunaldiren erreferente bihurtu da. Gainera, emakume kantarien ahotsa lehen lerrora eramanez, euskal musika esparrua eraldatu eta aberastu du", adierazi dute.

IBILBIDEA

Bere ibilbidean zehar, hainbat musikarirekin lankidetzan aritu da, eta hainbat disko argitaratu ditu, euskal musikaren esparruan "mugarri" bihurtu direnak.

Orobat, bere ekarpena ez da bakarrik musika arlora mugatu, euskal kulturaren aldeko konpromiso sakon batean ere islatu baita. Horrela, Zubiriak bere musikan poesiaren indarra azpimarratu du beti, hainbat euskal idazleren hitzak musikatu eta interpretatuz.

Zinemarako egindako ekarpenak ere nabarmenak dira, hainbat film eta dokumentaletarako soinu banda eta musika sortu baititu. "Horrek guztiak bere obra euskal kulturaren funtsezko zati bihurtu du", gaineratu dute.

Monzon-Ganuza sariaren bidez, Zubiriaren lanari aitortza egin nahi izan diote Olaso Dorrea Fundazioak eta Bergarako Udalak, eta bere konpromisoa, berrikuntza eta sormenaren bidea goraipatu.