Gasteizko Udaleko gobernu batzordeak hiriko hainbat kolektibori zuzendutako euskara ikastaroak emateko kontratazio espedientea onartu du ostiral honetan. Udal Euskara Zerbitzuak sustatutako ekimenak 960.000 euroko inbertsioa eskatuko du guztira, eta 2026ko uztailaren 1etik 2028ko ekainaren 30era bitarte egingo da, Maider Etxebarria alkateak iragarir duenez.
Ikastaroak Euskara Sustatzeko Ekintza Planaren (AROA) eta Udalean Euskararen Erabilera Normalizatzeko Planaren barruan sartuta daude. "Eskola adineko seme-alabak dituzten gurasoei, 55 urtetik gorako pertsonei, merkataritzako eta ostalaritzako langileei, atzerritar jatorriko pertsonei eta udal langileei zuzenduta daude, bai eta erabaki daitezen beste kolektibo estrategiko batzuei ere", zehaztu du alkateak.
Eskolak presentzialak izango dira eta gizarte etxeetan, Bizan sarean eta hiriko zenbait ikastetxetan emango dituzte. Euskararen ezagutza izan baina beren maila akreditatu ezin dutenek ezagutza maila egiaztatzeko probak egin beharko dituzte matrikulatu aurretik.
Bestalde, beste gai batzuekin jarraituz, Gaztea Sariak banatzeko ekitaldia martxoaren 5ean ospatuko da Euskalduna Bilbao jauergian, eta, urtero bezala, euskal musikak emandako onena aitortuko dute bertan. Artista horietako asko oholtza gainera gonbidatuko ditu Gaztea irratiak, galarako propio prestatutako ikuskizuna eskaintzeko.
EITBk jakinarazi duenez, aurreko urtean zehar jasotako uztari erreparatu eta artista, kanta, disko, bideoklip eta zuzeneko onenak sarituko dira, besteak beste. Aurten, baina, aldaketak izango dira hautaketa prozesuan, eta Gazteak osatutako epaimahai batek erabakiko ditu kategoria gehienetako irabazleak. Halere, izango da bozkatzeko aukerarik, Gazteako ikus-entzuleek bi kategoriatako irabazleak erabakiko baitituzte webgunean abiatuko den bozketan.
Gainera, kategoria berria sortu dute aurtengo sarietarako: Ikuskizun Onena. Sari honekin, 2025ean izan diren kontzertu eta ikuskizun bereziak sarituko dituzte. Galan zehar ikusiko diren emanaldietako protagonisten izenak laster jakinaraziko dira, baina inoiz baino zuzeneko gehiago izango direla iragarri dute.