Gasteizko Udaleko gobernu batzordeak ikus-entzunezko proiektuak garatzeko eta ekoizteko eta gidoiak idazteko laguntzen hamargarren deialdia onartu du ostiral honetan, eta 110.000 euro banatuko ditu 2026ko udal aurrekontuen kontura. Deialdia Arabako Lurralde Historikoaren Aldizkari Ofizialean argitaratu eta hurrengo egunean hasi eta 20 egun balioduneko epean amaituko da eskaerak aurkezteko epea.
Maria Nanclares, Ekonomia Sustapen, Enplegu, Merkataritza eta Turismoko zinegotziak, azaldu duenez, "Udalak tokiko ikus-entzunezkoen sektorea babesten du dagoeneko finkatuta dagoen laguntza lerro honekin. Talentu handia dago gure hirian, eta horri balioa eman nahi diogu. Berritasun gisa, 5.000 eurotik 10.000 eurora igoko ditugu gidoiak idazteko diru laguntzak".
Deialdiak tokiko 12 proiektu diruz lagundu zituen 2025ean. Film luzeen eta telesailen kategorian, honakoak filmatzen lagundu zen: Amania Films-en 'Ehiza', Sirimiri Films-en 'La Koreana', Área Proyectos Audiovisuales y Culturales-en 'Estoucha', CSC Films-en 'Hijos de Adán' eta Ikusgarri Films-en 'La noche de las ánimas'.
Iaz finantzatutako film laburrei dagokienez, Huts Laborategiaren 'Markel eta kurriloak', CSC Films-en 'Basandere', Orlok Films-en 'Gosea', Katxarreria Films-en 'Hemen lehen eguzkiloreak landatzen genituen' eta Ametza Films-en 'L'aurora' daude. Gainera, Gasteizko Udalak diruz lagundu zuen Miren Barrenaren 'Antípoda' eta Juan Ibarrondoren 'Insumisos' gidoien idazketa.
"Gasteizen une gozoa bizi dugu sormen eta kultura industriei dagokienez, eta Enpresen Udal Zerbitzutik goranzko bidean dauden sektore horretako profesionalei lagundu nahi diegu", azpimarratu du Maria Nanclaresek.