Euskaltel-Euskadi txirrindularitza taldeak sei lasterketa jokatuko ditu asteazken honetatik igandera bitartean, Mallorcako bost sariak eta La Marseillaise Sari Nagusia, hain zuzen ere, eta, beraz, taldea bi multzotan banatuko da.
Horrela, taldeko iturriek jakinarazi dutenez, Jon Agirre, Yago Agirre, Unai Aznar, Mikel Bizkarra, Samuel Fernandez, Paul Hennequin, Xabier Isasa, Txomin Juaristi, Jordi Lopez, Iker Mintegi, Gari Ugarte eta Danny van der Tuuk Mallorcan izango dira Jorge Azanzaren zuzendaritzapean. Agirrek, Aznarrek eta Fernandezek maillot laranjarekin debuta egingo dute, eta Louis Sutton baja izango da, igandean Valentziako Clàssica Comunitat lasterketan erori ostean.
Aldi berean, Nico Alustiza, Xabier Berasategi, Jonathan Lastra, Jordi Lopez, Jokin Murguialday, Gotzon Martin eta Axel van der Tuuk taldekideek osatutako bigarren blokeak Grand Prix Cycliste la Marseillaise klasikoa jokatuko du igandean, Pablo Urtasunen gidaritzapean. Frantziako Kopako lehen proba puntuagarria da eta Van der Tuuken estreinaldia ekarriko du.
BESTE GAI BATZUK
Bestalde, Metro Bilbaoren ibilbidean zehar egiten den Underrun lasterketaren hirugarren edizioa nobedadeekin dator, lehia helbururik gabeko kirol probak bi ibilbide ezberdin izango baititu martxoaren 29tik 30erako gauean, metro zerbitzua amaitu eta gero.
Horrela jakinarazi du asteazken honetan Eneko Arruebarrena Metro Bilbaoko zuzendari nagusiak, Barakaldoko alkate Amaia del Camporekin eta Carlos Gurpegi, Aritz Erkiaga, Aitzol Atutxa edo Naia Fernandez kirolariekin batera egindako aurkezpenean.
Metro Bilbaoren 30. urteurrenaren harira, aurtengo edizioaren nobedadea ibilbidea izango da. Moyuatik abiatu eta Indautxu, Santimami, Deustu, Sarriko, San Ignazio eta Gurutzeta geltokietatik pasatzen den ohiko ibilbideari beste bat gehitu zaio: Basarratetik abiatuko da, eta, bestea bezala, Ansion bukatuko da, Santutxu, Zazpikaleak eta Abandotik ere pasatuz.