Athletic Club-ek eta Clara Pinedo-k akordioa lortu dute harrobiko jokalariaren kontratua lau denboraldiz luzatzeko, 2030eko ekainaren 30era arte. 22 urteko bilbotarra munduko eta Europako txapelduna maila gazteetan, eta proiekzio handiena duen jokalarietako bat da talde zuri-gorrian.
Pinedok asteazken honetan egin du kontratu berriaren sinadura ekitaldia San Mamés-en, Jon Uriarte presidentea eta Xabi Arrieta ere bertan zirela.
Clara Pinedo Bizkerre FT taldetik heldu zen Lezama-ra 2019-2020ko denboraldian. Gaztea izan arren, jada ibilbide sendoa egin du taldean, eta denboraldi honetan 100 partiduen langa gainditu du (117). 2021eko ekainean debuta egin zuenetik, 21 gol sartu ditu, eta aurrealdean funtsezko jokalari bihurtu da.
Denboraldi honetan ezin izan zuen F Liga-ko zortzigarren jardunaldira arte jokatu, denboraldiaurreko azken partidan sorbaldan lesio bat izan eta ebakuntza behar izan baitzuen. Hala ere, dagoeneko finkoa da Javi Lerga-ren hamaikakoan, azpimarratu dute bertatik.
Pinedok berak argi utzi du bere konpromisoa: "Athletic Clubekin kontratua berritzea izan da nire aukera bakarra. Kamiseta hau janztea txikitatik amestu dudan gauza oso berezia da".
Gainera, azpimarratu du ingurune pertsonalak duen garrantzia: "Etxean nago, nire familiarengandik eta lagunengandik gertu, eta hori ere garrantzitsua da niretzat. Ehun partida baino gehiago jokatzeak harrotasunez betetzen nau, klubak beti egin du nire aldeko apustua eta beste lau urtez lotura luzatzea eskertzeko modu bat da".