Bizan Zaramaga zentro berriak ireki ditu berriki ateak Gasteizen, irisgarritasunean eta jasangarritasun energetikoan hobekuntza nabarmenak ekarri dituen erreforma integrala bukatu ondoren, 1,5 milioi euroko inbertsioa eginda.
Gainera, beste aldaketa garrantzitsu batzuk egingo dira arretan, hurbilagoa eta pertsonalizatuagoa izan dadin, Iparraldeko oinarrizko gizarte zerbitzuko profesionalak lokal berrian kokatuta egongo direlako, eta Maiteki familia zaintzaileei laguntzeko programak zentroan ere garatuko duelako bere jarduera, Kuadrilla kalean.
Bizan Zaramagaren erreforma lana Eusko Jaurlaritzaren Etxebizitza eta Hiri Agenda Sailak onartutako auzoak berroneratzeko Inbertsio Estrategikoen Planean jasotako jarduketen barruan dago, eta Gasteizko Udalak Zaramaga auzoaren hiri, gizarte eta ingurumen berroneratzean jarduteko duen konpromiso estrategikoetako batetik dator.
Maider Etxebarria Gasteizko alkateak 1,5 milioi euroko inbertsioa nabarmendu du irekiera ekitaldian, espazioak birbanatu, intsonorizazioa eta irisgarritasuna hobetu, eta energia eraginkortasuna indartu ahal izan direlako, besteak beste. Ildo horretan, adierazi du zentroak berriro ireki dituela ateak auzoko adinekoei "betiko zerbitzu, arreta eta tratu hurbil bera eskaintzeko, baina espazio erabat berritu, modernoago eta askoz erosoagoan".
Obrak egin bitartean, jarduerak Errege-Erregina Katolikoen kaleko lokal batera lekualdatu ziren, eta alkateak eskerrak eman dizkie Bizan Zaramagako teknikariei egindako ahaleginagatik, "aldi baterako lekualdaketa hori normaltasun osoz bizitzeko eskaini duten dedikazioagatik eta maitasunagatik".
Gasteizko Udaleko Eraikinak Mantentzeko Zerbitzuak egindako obraren ondoren, espazioa erabat eraldatuta dago, eta modernoagoa, irisgarriagoa, erosoagoa eta adinekoen egungo beharretara egokituagoa da. Lokalak 710 metro koadroko azalera erabilgarria du, eta eraberritu ondoren, banaketa funtzionalagoa du, egungo materialekin eta diseinuarekin. Hobekuntza akustiko eta termikoei hurbileko zainketa eremuaren integrazioa, pertsonen zirkulazio koherenteagoa eta espazioaren aprobetxamendu hobea gehitu behar zaizkie.
Jantokiak ere ostiral honetan ireki ditu ateak, 70 plazarekin. Gainera, sukalondoa, kafetegia, erabilera anitzeko gelak, ikus-entzunezkoen gela, topaketetarako eta irakurketarako gelak, ile apaindegia, podologia, aldagelak, komunak eta biltegiak ditu zentroak.