Arabako Foru Aldundiko gobernu kontseiluak lurralde historikoan enpresa berrien sorrera eta sendotzea bultzatzea asmo duen Ekin Araban 2026 laguntza ildoaren ebazpena onartu du. Deialdiak 999.997,58 euro banatuko ditu laguntzetan 88 enpresa proiekturen artean, diruz laguntzeko 1.510.136,36 euroko guztizko aurrekontuarekin.
Foru erakundeak jakinarazi duenez, laguntza gehienak enpresa berriak sortzeko ekimenei dagozkie, enpresak sendotzeko hainbat proiekturekin batera. Ildo horren helburua da ekintzaileei eta enpresa sortu berriei laguntzea proiektuak garatzeko lehen faseetan, Arabako ehun ekonomikoa indartuz, jardueraren dibertsifikazioa bultzatuz eta lurraldean balio erantsia sortzeko gaitasuna duten ekimenak babestuz.
Lagundutako proiektuen artean, osasunari aplikatutako adimen artifizialari, automatizazio industrialari, enpresa txiki eta ertainentzako eta saltokientzako zibersegurtasunari, fabrikazio aurreratuari, ekoturismoari, enoturismoari, ekonomia zirkularrari, zerbitzuen digitalizazioari, ikus-entzunezko produkzioari, online prestakuntzari, 3D inprimaketari, bideojokoei, kosmetika aurreratuari edo landa inguruneko albaitaritza zerbitzuei lotutako proposamenak daude.
DIRU LAGUNTZAK
Bestalde, Eusko Jaurlaritzako gobernu kontseiluak 2026. urteko ekitaldirako Euskal Autonomia Erkidegoko (EAE) nekazaritza eta elikadura produktuen kalitate araubideetarako laguntzen deialdia onartu du asterte honetan, 816.872,90 euroko guztizko zuzkidurarekin.
Jaurlaritzaren arabera, neurriaren helburua da EAEko nekazaritza eta elikadura produktuen kalitate bereizia sustatzea, nekazaritza ustiategien lehiakortasuna indartzea eta aitortutako kalitate figurak baliatuz balio erantsia sortzea da. Era berean, produktuen ikusgarritasuna eta merkatuan duten kokapena hobetzea du xede, informazio eta sustapen jardueren bidez.
Deialdiak hiru laguntza ildo ditu. Alde batetik, nekazariei kalitate araubideetara biltzen laguntzeko diru laguntzak daude, parte hartzearen ondoriozko kostuak estaltzen lagunduko duen urteko prima baten bidez; bestetik, kalitate sistema horietan sartutako pertsonei aurreko deialdietan emandako laguntzei jarraipena emango zaie; azkenik, kalitate figuren babespean dauden produktuak ezagutarazteko ekoizleen elkarteek bultzatutako informazio eta sustapen jarduerak finantzatuko dira.